Jesus Outreach Ministries

பாவிகளை இரட்சிக்க கிறிஸ்து இயேசு உலகத்தில் வந்தார் என்கிற வார்த்தை உண்மையும் எல்லா அங்கிகரிப்புக்கும் பாத்திரமுமானது. – (1 தீமோத்தேயு 1:15)..

ஒரு ஊரை சேர்ந்த மக்கள் வித்தியாசமான ஒரு வியாதியால் பாதிக்கப்பட்டிருந்தனர். இதை கேள்விப்பட்ட ஒரு புகழ்பெற்ற மருத்துவர் அந்த நோயை ஆராய்ந்து, நல்ல ஒரு மருந்தைக் கண்டுபிடித்தார். தனது மிகுந்த அலுவல்கள் மத்தியிலும் அந்த மருத்துவர் ஒரு நாளை நியமித்து அன்று அவர்களுக்கு சிகிச்சை அளிக்க முடிவு செய்தார். இச்செய்தியைக் கேட்ட ஊரார் மிகவும் சந்தோஷப்பட்டனர். அவருக்கு பெரிய அளவில் மரியாதையும் வரவேற்பும் கொடுக்க விரும்பினர். அந்த நாளும் வந்தது. மக்கள் அவரை குதிரையில் ஏற்றி, வீதி வீதியாய ஊர்வலம் வந்து கௌரவப்படுத்தினர். பட்டடாசுகள் வெடித்தனர். பல பிரமுகர்கள் அவரை வாழ்த்திப் பேசி புகழாரம் சூட்டினர். பின் அவருக்கு அறுசுவை உணவுகளை தயாரிப்பதிலும், அவரை கவனிப்பதிலும் மூழ்கிப்போன அந்த மக்கள் அவரிடம் சிகிச்சை பெற கவனம் செலுத்தவில்லை. மாலை வந்தபோது மருத்துவர் அவசர வேலையாக ஊருக்கு திரும்பினார். அவர்களோ தொடர்ந்து நோயாளிகளாகவே இருந்தனர்.

இந்த ஜனங்கள் செய்தவை யாவும் நல்ல செயல்கள்தான். ஆயினும் முக்கிய நோக்கத்திற்கு அவர்கள் முதல் கவனம் செலுத்தவில்லை. இதுப்போலவே பாவிகளை இரட்சிக்க உலகத்தில் உதித்த இயேசுகிறிஸ்துவின் பிறப்பை கோடிக்கணக்கானோர் வெகு விமரிசையாக வருடந்தோறும் கொண்டாடுகிறார்கள். டிசம்பா மாதம் வந்துவிட்டால் விசேஷ ஆராதனைகள், பாடல் நிகழ்ச்சிகள், வண்ண விளக்குகள், புத்தாடைகள், இனிப்பு, விருந்து என கொண்டாட்டத்தின் நாட்களாக அவை மாறி விடுகின்றன. இன்னும் அநேக இடங்களில் குடித்து கும்மாளமிடுவதும் கிறிஸ்மஸின் கொண்டாட்டங்களில் முக்கிய பங்கு வகிக்கிறது. ஆனால் இயேசுகிறிஸ்து எதற்காக வந்தார்? என் பாவத்திலிருந்து விடுதலையளிக்க அல்லவா வந்தார். அதை நான் பெற்றிருக்கிருக்கிறேனா என்று அநேகர் சிந்திப்பதில்லை.

பொதுவாக எல்லா மனிதர்களிடமும் பாவம் என்ற கொடிய நோய் காணப்படுகிறது. அதன் வெளிப்பாடுகள் தான் தவறான சுபாவம், தவறான இயல்பு. தவறான செயல், தவறான மனநிலை ஆகும். அந்த பொல்லாத பிசாசின் கிரியைகளை அழித்து, நமக்கு விடுதலையளிக்கவே இயேசுகிறிஸ்து உலகத்திற்கு வந்தார். அவர் நமது கனத்தையும், மரியாதையையும், காணிக்கையையும் பெறுவதை பிரதான நோக்கமாக கொண்டு பூமிக்கு வரவில்லை, ஒரு விசேஷ செயலை ஒவ்வொரு மனிதனுக்குள்ளும் செய்ய வந்தார். அதாவது நமக்குள் இயங்கும் பாவத்தின் ஆதிக்கத்தை அழித்து அப்புறப்படுத்தவே வந்தார்.

எனவே மருத்துவரை வரவேற்பதிலேயே கவனத்தை செலுத்தி, சிகிச்சை பெறாமல் போன மக்களைப் போலல்லாமல், முதலாவது ஆண்டவரை நமக்குள் செயல்பட அனுமதிக்க வேண்டும்.  இரட்சிப்பை பெற வேண்டும். அதற்கு உடன்படாமல் நாம் செய்கிற அத்தனை வழிபாடுகளும், ஆராதனைகளும், ஊழியங்களும், பண்டிகை கொண்டாட்டங்களும் அர்த்தமற்றவைகளே! அவைகள் ஒருபோதும் தேவனை பிரியப்படுத்தாது.

பிரியமானவர்களே, அன்று பஸ்கா பண்டிகையை வெகு விமரிசையாக கொண்டாடிய எருசலேம் மக்களை பார்த்து இயேசு கண்ணீர் விட்டார். காரணம் விடுதலையை நினைவு கூறும் அப்பண்டிகையிலே மக்கள் விடுதலையின்றி இருந்தார்கள். இருப்பினும் விடுதலை அளிக்கும் தேவனைக் குறித்து சிந்தியாமல், வெறும் பண்டிகை கொண்டாட்டத்தில் மூழ்கி இருந்தனர். அன்று எருசலேமைப் பார்த்து அழுத இயேசு இன்று நமது கொண்டாட்டங்களைப் பார்த்து மகிழ்வாரா? பாவத்திலிருந்து விடுதலை பெறுவதே நமது பண்டிகைகளின் பிரதான நோக்கமாக இருக்கட்டும்.

நமது கொண்டாட்டங்கள் கர்த்தரை மகிழ்விப்பதாக இருக்கட்டும். உலகம் கொண்டாடுவதால் நானும் கொண்டாடுகிறேன் என்று எண்ணாமல், கர்த்தர் எதற்காக இந்த உலகத்திற்கு வந்தார் என்பதை நினைவு கூர்ந்து, கர்த்தரைக் குறித்து அறியாதவர்களுக்கு அவர் வந்ததன் நோக்கத்தை அறிவிக்கிறவர்களாக இந்த தருணத்தை பயன்படுத்துவோமாக. கர்த்தரின் இரண்டாம் வருகை நெருங்கி கொண்டிருக்கும் இந்த வேளையில் அவருடைய முதலாம் வருகையைக் குறித்து அறிவித்து, அவரது இரண்டாம் வருகைக்கு ஒரு கூட்டத்தை ஆயத்தப்படுத்த இந்த நாட்களை  பிரயோஜனப்படுத்துவோமாக. ஆமென் அல்லேலூயா!

என் பாவம் தீர்ந்த நாளையே
அன்போடு எண்ணி ஜீவிப்பேன்
அந்நாளில் பெற்ற ஈவையே
சந்தோஷமாய் கொண்டாடுவேன்

இன்ப நாள் இன்ப நாள்
என் பாவம் தீர்ந்து போன நாள்
பேரன்பர் என்னை இரட்சித்தார்
சீராக்கி இன்பம் நல்கினார்
இன்ப நாள் இன்ப நாள்
என் பாவம் தீர்ந்து போன நாள்

எங்கள் அன்பின் பரலோக தகப்பனே, இயேசுகிறிஸ்துவின் முதலாவது வருகையை உலகமெங்கும் விமரிசையாக கொண்டாடப்படும் இந்த நாட்களில் அவர் பரலோகத்தின் பாக்கியங்களை துறந்து இந்த உலகத்திற்கு வந்த அவரின் நோக்கத்தை உணர்ந்தவர்களாக ஒவ்வொருவரும் இரட்சிக்கப்பட கிருபை செய்யும். அவருடைய முதலாவது வருகையையே இன்னும் அறியாதவர்கள் மத்தியில் அவரைக் குறித்து அறிவிக்கிறவர்களாக ஒவ்வொருவரையும் மாற்றும். கர்த்தரின் வருகை நெருங்கி கொண்டிருக்கும் இந்த நாட்களில் அவருடைய வருகைக்காக பயத்தோடும் பக்தியோடும் ஆயத்தப்பட கிருபை பாராட்டும். எங்கள் ஜெபத்தை கேட்டு எங்களுக்கு பதில் கொடுப்பவரே உமக்கே நன்றி. இயேசு கிறிஸ்துவின் நாமத்தில் ஜெபிக்கிறோம் எங்கள் ஜீவனுள்ள நல்ல பிதாவே ஆமென்.